ලබන වසරේ මැයි 1 සහ 30 දෙදිනම වෙසක් පොහොය දෙකක් යෙදෙන බැවින් වෙසක් පුන් පොහෝ දිනය 30 වැනිදා ලෙස ප්රකාශයට පත් කරන්නැයි ත්රෛනිකායික මහානායක ස්වාමින්ද්රයන් වහන්සේ ජනපති අනුර කුමාර දිසානායක මහතා වෙත ලිපියක් යොමු කරමින් පවසති.
රාජ්ය පරිපාලන අමාත්යාංශය මඟින් ප්රකාශිත දින දර්ශනයට අනුව ලබන වසරේ මැයි මස 01 දින වෙසන් පුන් පොහෝ දිනය ලෙස ප්රකාශයට පත්කර තිබෙන බවත් එම දිනයේ දී විසා නැකැත නොයෙදෙන බැවින් වෙසක් පුන් පොහෝ දිනය ලෙස මැයි 30 යොදා ගැනීම සුදුසු බවත් ස්වාමීන් වහන්සේ ජනාධිපතිවරයා වෙත යැවූ ලිපියේ සඳහන් කර තිබේ. මැයි 1 දා විසා නැකැත නොයෙදීම නිසා එදින වෙසක් පුර පසළොස්වක පොහොය දිනය ලෙස පිළිගැනීම සම්බන්ධයෙන් සමාජයේ මේ වනවිට දැඩි සංවාදයක් නිර්මාණය වී ඇති බවත් මේ සම්බන්ධව අවධානය යොමු කළ ත්රෛනිකායික මහා නායක ස්වාමින්ද්රයන් වහන්සේ ප්රමුඛ ගරුතර කාරක මහා සංඝ සභාවන් සහ නැකැත්කරුවන්ගේද අදහස් විමසා චිරාගත ශාසන සම්ප්රදායානුකූලවද විසා නැකැත යෙදෙන එළැඹෙන මැයි 30 වැනි දින වෙසක් පොහෝ දිනය ලෙස යොදා ගැනීම බව තීරණය කළ බවත් එම ලිපියේ සඳහන් කර ඇත.
ඒ අනුව වෙසක් පුන් පොහෝ දිනය හා සබැඳි චිරාගත ශාසනික මෙන්ම ආගමික කර්තව්යයන් හා රාජ්ය උත්සව ද එදිනට යොදා ගැනීමට අදාළ රාජ්ය නිලධාරීන් වෙත උපදෙස් ලබා දීමට කටයුතු කරන ලෙසත් අදාළ ලිපිය මඟින් මහානායක ස්වාමින්ද්රයන් වහන්සේ ජනාධිපතිවරයාට දැනුම් දී ඇත.
මල්වතු පාර්ශ්වයේ මහානායක තිබ්බටුවාවේ ශ්රී සිද්ධාර්ථ, අස්ගිරි පාර්ශ්වයේ මහානායක වරකාගොඩ ශ්රී ඤාණරතන, අමරපුර මහා නිකායේ මහානායක කරගොඩ උයන්ගොඩ මෛත්රී මූර්ති, ශ්රී ලංකා රාමඤ්ඤ මහා නිකායේ මහානායක මකුලෑවේ විමල යන මහානායක ස්වාමින්ද්රයන් වහන්සේගේ අත්සනින් මේ ලිපිය ජනාධිපතිවරයා වෙත යොමු කර තිබේ.