නීතිඥ බුද්ධික මල්ලවාරච්චි මහතා සහ ඔහුගේ බිරිය අකුරේගොඩදී වෙඩි තබා ඝාතනය කිරීමට සම්බන්ධ දෙවැනි වෙඩික්කරු රටින් පලා යෑමට කල්තියාම වෙනත් පුද්ගලයකුගේ නමින් විදෙස් ගමන් බලපත්රයක් සකස් කර තිබී ඇතැයි විමර්ශනවලින් අනාවරණයවී තිබේ. එසේ සකස් කළ විදෙස් ගමන් බලපත්රයේ තොරතුරු විමර්ශන කණ්ඩායම් වෙත ලැබී ඇත. වෙඩික්කරු සම්බන්ධයෙන් තොරතුරු ඉල්ලා පොලීසිය මහජන සහාය පතා නිකුත් කළ AI ඡායාරූප මාධ්යයට නිකුත් කරන්නේ එම ව්යාජ විදෙස් ගමන් බලපත්රය සකස් කිරීමට යොදා ගත් ඡායාරූපයෙන් බව ද පොලිස් තොරතුරු අනාවරණය කළේය.
පාතාලයේ කුලී ඝාතකයෙක් වන එම වෙඩික්කරුගේ සැබෑ අනන්යතාව නිශ්චිත ලෙස මෙතෙක් තහවුරුවී නැති බවත්, ඔහු මේ වන විට රටේ සිටී ද නැතිනම් රටින් පලාගොස් තිබේ ද යන්න සැක සහිත බවත් උසස් පොලිස්
නිලධාරියෙක් පැවසීය.
මේ වෙඩික්කරු තවත් ඝාතන රැසකට සම්බන්ධ අයෙක් බව පෙනී යන බවත්, ඔහු කොටුකර ගැනීමෙන් අබිරහස් රැසක් හෙළි කරගැනීමට හැකි වනු ඇති බවත් පොලිස් බලධාරීහු විශ්වාස කරති. නීතිඥවරයාගේ බිරිය දෙසට රිවෝල්වරයකින් වෙඩි තබන්නේ මේ වෙඩික්කරු විසින් බව ද පොලීසිය සඳහන් කරයි.
මේ ද්විත්ව ඝාතනයේ ප්රධාන වෙඩික්කරු බව සඳහන් නීතිඥයාට ටී 56 අවියෙන් වෙඩි තැබූ සැකකරු දින 90 ක් රඳවාගෙන විමර්ශන පවත්වන බව ද පොලීසිය කියයි. ඊට අවශ්ය නියෝග පෙරේදා (22) ලබාගෙන තිබේ.
කරන්දෙණිය සුද්දා විසින් මේ ඝාතනය සැලසුම් කර ඇති බවත්, ටුටූ නමැත්තා විසින් ඝාතනය මෙහෙයවා ඇති බවත් පැහැදිලිවම අනාවරණය වී ඇතැයි විමර්ශන කණ්ඩායම් සඳහන් කරති. අත්අඩංගුවේ සිටින වෙඩික්කරුව මේ ද්විත්ව ඝාතනයට යොදාගෙන ඇත්තේ කරන්දෙණිය සුද්දා විසින් බව ද පොලීසිය කියයි. කරන්දෙණිය සුද්දා තමාට උදවුඋපකාර කර ඇති බැවින් සහ ඔහුට ණය වී ඇති රුපියල් ලක්ෂ 02 ක මුදල වෙනුවෙන් මේ අපරාධයට තමා සම්බන්ධ වූ බවත් සැකකාර වෙඩික්කරු ප්රශ්න කිරීම් හමුවේ පවසා තිබේ.
තමාගෙන් වැඩක් ගැනීමට ඇති බව දින කිහිපයක් තිස්සේ කරන්දෙණිය සුද්දා දුරකතනයෙන් පැවසූ බවත්, ඕනෑම වැඩකට කැමති බව ඔහුට පැවසූ බවත් අත්අඩංගුවේ සිටින වෙඩික්කරු ප්රශ්න කිරීම් හමුවේ පවසා ඇත. ඒ අනුව පසුගිය 10 වැනිදා කරන්දෙණිය සුද්දාගේ උපදෙස් මත කොළඹට පැමිණි බවත්, පන්නිපිටිය ප්රදේශයේ පිහිටි හෝටලයක නවාතැන් සකස් කර තිබූ බවත් ඔහු පවසා ඇත. නීතිඥවරයකු ඝාතනය කිරීමට ඇති බව තමා දැනගත්තේ 13 වැනිදා උදෑසන බවත්, එම ඝාතනයට හේතුව කුමක්දැයි කරන්දෙණිය සුද්දා තමාට නොපැවසූ බවත් ඔහු ප්රශ්න කිරීම් හමුවේ පවසා ඇත.
රැඳවුම් නියෝග මත සිටින කාලයේ මෙෙතක් අනාවරණය නොවූ තොරතුරු හෙළිවනු ඇතැයි පොලීසිය විශ්වාස කරයි.
මේ අතර නීතිඥවරයා සහ බිරිය ඝාතනයට ආධාර අනුබල දුන් බව පැවසෙන තවත් පුද්ගලයකු පෙරේදා (22) රාත්රියේ බස්නාහිර පළාත දකුණු දිසාව අපරාධ කොට්ඨාසයෙන් අත්අඩංගුවට ගෙන තිබේ.එම සැකකරු සමඟ මේ වන විට එම අපරාධය සම්බන්ධයෙන් අත්අඩංගුවට ගත් මුළු සැකකරුවන් සංඛ්යාව දස දෙනෙකි. මේ අපරාධයට සම්බන්ධ මෝටර් රථ දෙකක් ද පොලිස් භාරයට ගෙන ඇත.