පෞද්ගලික රූපවාහිනි නාළිකාවක මේ දිනවල ඉතා ජනප්රිය ටෙලි නාට්යයක රංගනයෙන් දායකවන ජනප්රිය රංගන ශිල්පියෙක් ඇතුළු තිදෙනකු කොකේන් මත්ද්රව්ය මිලිග්රෑම් දහයක්, ගංජා මිශ්ර චිප්ස් මත්ද්රව්ය ග්රෑම් දෙසිය පනස්පහක් සමඟ මත්තේගොඩ පොලීසිය මඟින් අත්අඩංගුවට ගෙන තිබේ.
පිළියන්දල ප්රදේශයේ බෝඩිම් කාමරයක තිබී මේ මත්ද්රව්ය තොගය අත්අඩංගුවට ගෙන ඇති අතර මෙසේ අත්අඩංගුවට ගත් සැකකරුවන් අනුරාධපුර ප්රදේශයේ සහ පිළියන්දල ප්රදේශවල පදිංචි (26 සහ 28) වයසේ පසුවන තිදෙනකු බව පොලීසිය කියයි.
කොළඹ සිට අනුරාධපුරයට මත්ද්රව්ය ප්රවාහනය කරන පුද්ගලයකු පිළිබඳ මත්තේගොඩ පොලීසියේ ස්ථානාධිපති පොලිස් පරීක්ෂක ඉන්දික කුමාර මහතාට ලද තොරතුරක් අනුව පිළියන්දල නගර මධ්යයේ බෝඩිං කාමරයක් පරික්ෂා කරන ලදී. එහිදී කුරියර් සේවාවක සේවය කරන පුද්ගලයකු ගංජා මිශ්ර චිප්ස් ග්රෑම් පනහක කැටයක් සමඟ එම ආයතනය ඉදිරිපිටදී අත්අඩංගුවට ගෙන තිබේ. පසුව සැකකරු රැඳී සිටි බෝඩිමට ගොස් එය පරික්ෂා කිරීමේදී එහි රැඳී සිටි පුද්ගලයකු සන්තකයේ කොකේන් මත්ද්රව්ය මිලිග්රෑම් දහයක් තිබී හමුවූ බවත් ඔහු මේ දිනවල පෞද්ගලික රූපවාහිනී නාළිකාවක විකාශනය වන ටෙලි නාට්යයක රංගන ශිල්පියකු බව පොලීසිය කියයි. පසුව මෙම මත්ද්රව්ය සැකකරුවන්ට ලබා දෙන පුද්ගලයා පිළිබඳ ලද තොරතුරකට අනුව ඔහුගේ පිළියන්දල නිවස පරීක්ෂා කිරීමේදී එහි තිබී තවත් ගංජා මිශ්ර චිප්ස් ග්රෑම් 255 ක් හමු වී තිබේ. පසුව සැකකරුවන්ගෙන් කළ ප්රශ්න කිරීමේදී එම මත්ද්රව්ය අවසන් වරට අත්අඩංගුවට ගත් සැකකරු විසින් ලබා දෙන බවත්, එසේ ලැබෙන මත්ද්රව්ය කොළඹ සිට අනුරාධපුරයට කුරියර් සේවාවක් හරහා ප්රවාහනය කරන බවට තොරතුරු අනාවරණය වූ බවත් පැවසේ. ඒ අනුව අත්අඩංගුවට ගත් සැකකරුවන් තිදෙනා ඊයේ (17දා) කැස්බෑව අධිකරණයට ඉදිරිපත් කිරීමට නියමිතව තිබිණි.